સ્ત્રીનો સ્પર્શ એટલે શું? આપણા સમગ્ર જીવનમાં સ્ત્રીના સ્પર્શનું શું મહત્વ છે? શું ખાસિયત છે અને એની કેવી અદ્ભૂત અનુભૂતિ છે! શું આવું આપણે ક્યારેય વિચાર્યું ખરું? સ્ત્રીનો સ્પર્શ એક માતાનો હોય, બહેનનો હોય, પ્રેમિકાનો હોય, સખી મિત્રનો હોય, પત્નીનો હોય, દીકરીનો હોય કે પછી કોઈપણ સ્ત્રીનો હોય, આ અદભુત સ્પર્શ આપણા જીવાઈ રહેલા વર્ષોમાં જીવન ભરે છે.
કોઈ પણ મોટી મુશ્કેલીમાં હોઈએ કે પછી કોઈપણ ઊંડા દુઃખ-દર્દમાં હોઈએ, જ્યારે માથા પર માંનો વહાલભર્યો હાથ ફરે છે ત્યારે જે હેત વર્ષે છે તેમાં બધું આવી જાય છે. માતાએ કશું કહેવું નથી પડતું, એ સ્પર્શમાં જ એ આપણા સાથે છે, આપણને સાચવી લેશે, સંભાળી લેશે, આવું બધું જ ન કહેવાયેલું કહેવાઈ જાય છે. પુરુષ હોય કે સ્ત્રી હોય આખરે તે એક સ્ત્રીનો જ અંશ છે. એક સ્ત્રીએ જ તેને જન્મ આપ્યો છે. જીવનના દરેક તબક્કે આપણે આ સ્ત્રીના સ્પર્શની ઝંખના હોય છે. તેના વિના જાણે બધું અધૂરું હોય છે.
સ્ત્રીના સ્પર્શમાં એક ઋજુતા હોય છે, કોમળતા હોય છે, સ્નેહ અને ભરપૂર વહાલ હોય છે. એક પોતીકાપણું હોય છે એ સ્પર્શમાં. એ સ્પર્શ જે અનુભૂતિ બક્ષે છે તે માત્ર અનુભવી શકાય છે, શબ્દો પણ તેને વર્ણવવા ઓછા પડે છે.
આ પૃથ્વી પર આવતાની સાથે સૌથી પહેલો મળતો માતાનો સ્પર્શ હોય છે, પોતાનું સર્વસ્વ આપવાની લાગણી સાથે ખૂબ બધું વહાલ વરસાવે છે એ સ્પર્શ. એક બહેન, એક પ્રેમિકા, એક પત્ની, એક દિકરી, આવા તો કેટલાય સ્વરૂપે એક સ્ત્રીનો સ્પર્શ સતત હાજર હોય છે.
સ્ત્રી-પુરુષના સંબંધો વિશે ઘણી વાતો થાય છે, પુરુષ સ્ત્રીમાં કયા ગુણો જોવે છે? કેવી સ્ત્રી તેને પસંદ છે? વગેરે..વગેરે.. પુરુષની સ્ત્રી પાસે અપેક્ષાઓ અને ઈચ્છાઓ ઘણી હોય છે, પરંતુ મને લાગે છે કે આખરે એક સૌથી મહત્વની કોઈ વસ્તુ જો પુરુષ ઝંખતો હોય છે તો તે આ સ્ત્રીનો સ્પર્શ હોય છે. સ્ત્રીનો સ્પર્શ જે તેના જીવનને સરળ, સંપૂર્ણ, વ્યવસ્થિત, હર્યુભર્યું અને સુરક્ષિત બનાવે. સ્ત્રીનો સ્પર્શ જે તેના જીવનના દરેક તબક્કે તેને અહેસાસ કરાવે કે કોઈ છે તેના સાથે અને કોઈ હરહંમેશ રહેશે તેના સાથે.
સ્ત્રીના સ્પર્શમાં એવું શું હોય છે જે આપણે હંમેશાં ઝંખતા હોઈએ છીએ? સ્ત્રીના સ્પર્શમાં આપણી અંદર ઊંડે રહેલી ખાલીપણાની ભાવનાને દૂર કરતી લાગણી હોય છે. આપણને સાચા અર્થમાં સમજી શકતી પ્રમાણિકતા હોય છે. ભાગદોડભરી જિંદગીમાં આપણી વાતોને માત્ર ખુલ્લા કાને નહીં પરંતુ ખુલ્લા હૃદય અને ખુલ્લા મને સાંભળી શકવાની નમ્રતા હોય છે. આપણી જાતની ખૂબીઓને સામે લાવી આપણે એક નવી હિંમત આપતી મજબૂતી હોય છે. ગમે તેવા ઊંડા અંધકારમાં પણ ટકી રહી અજવાળામાં આપણે ખેંચી લાવતી સહનશીલતા હોય છે. સ્ત્રીનો સ્પર્શ આપણા એક જ ઘરેડમાં ચાલતા જીવનમાં નવીનતા બક્ષે છે, સુંદરતા બક્ષે છે અને આપણા જીવનને બગીચાની માફક સજાવે છે. સ્ત્રીનો સ્પર્શ એક એવી અદ્ભૂત લાગણી છે જે આપણે જીવનના દરેક તબક્કે અને દરેક મુકામે અનુભવીએ છીએ, પરંતુ ક્યારેક તેનું સાચા અર્થમાં મૂલ્ય કરવાનું ભૂલી જઈએ છીએ.
PAM 